Pasiuna

Download

“Apan ikaw, isulti ang mga butang nga sibo sa himsog nga pagtulon-an.” (Tito 2:1)

Maayong pag-abot dinhi sa website sa Healthy Teaching (Himsog nga Pagtulon-an)! Ang pamulong himsog nga pagtulon-an gibasi sa mga sinulat ni Pablo sa hapit na matapos ang iyang pagpangalagad, sa panahon nga nadaot ang kaiglesiahan, ug daghang iglesia ang nibiya niya. Nianang panahona, ang diosnong Pulong, ug labi na gyod, ang himsog nga pagtulon-an, mao ang tambal nga gigamit ni Pablo sa pagsumpo sa apostasiya ug sa kagubot diha sa iglesia

Ang himsog nga pagtulon-an maoy sulod sa pamatigayon sa Dios sa Bag-ong Tugon. Nagpasabot og duha ka elemento ang himsog. Sa positibong bahin, naay elementong makatil-og (1 Tim. 4:16), nga nangalagad og kinabuhi ug tugob sa espirituhanong sangkap. Sa negatibong bahin, naay elementong mopatay-sa-kagaw, nga nagbuhat batok sa espirituhanong mga problema ug mga sakit. Ang atong luwan sa mga sinulat nato niini nga website pagpadyag man nianang pulonga, nga motil-og ug mobakuna aron magmahimsog ang mga balaan ug ang kaiglesiahan sa espirituhanong bahin.

Gigamit ni Pablo ang pulong himsog sa paghulagway sa pulong makaunom sa Mga Sulat ngadto ni Timoteo ug ni Tito (1 Tim. 1:10; 6:3; 2 Tim. 1:13; 4:3; Tito 1:9; 2:1). Ning mga sulata, gihisgotan sab ni Pablo ang pipila ka butang nga batok sa himsog nga pulong. Naglakip kini sa mga sulusugilanon ug dili matapos nga mga talaan sa mga ginikanan (1 Tim. 1:4), walay pulos nga mga pagtabitabi (v. 6), ug siwitsiwit (4:7). Sa 1 Timoteo 6:4-5, gihisgotan ni Pablo ang “mga pakiglalisay ug mga pagbingkilay sa mga pulong, nga gigikanan sa mga kasina, away, mga pagdaot, daotang mga katahap, kanunayng pakiglalisay sa mga tawong dunot og hunahuna ug nawad-an sa kamatuoran, nga nagdahom nga kasapian nila ang pagkadiosnon.”

Labi pa gyong may kalabotan kining mga pulonga sa kaiglesiahan sa Pilipinas ning nilabayng mga tuig, kay nitumaw man sa atong taliwala ang mga sulusugilanon, mga paglalisay, mga pagbingkilay, ug mga pagdaot ug daotang mga katahap man ngani. Naglaom ta nga pinaagi sa atong mga sinulat nga gibasi sa Pulong ug sa pagpangalagad, maluwas tang tanan gikan ning mga sulusugilanon ug mapahiuli ngadto sa himsog nga pagtulon-an sa pamatigayon sa Dios. Tumong sab nato nga ipadayag ug ipatin-aw ang mga punto sa kamatuoran ug batasan, aron maluwas ta sa mga pangatarongan, ug mabihag ang atong mga hunahuna ngadto sa pagsugot ni Cristo (2 Cor. 10:5).

Sa kataposan, nag-ampo ta nga dili mabugnaw ang mga balaan tungod sa mga hagit sa panahon karon. Naa nay mga kagubot sa tibuok kasaysayan sa iglesia, bisan sa panahon ni Pablo. Ang kagubot sa Mga Buhat 21 maoy nakaingon sa pagkabilanggo ni Pablo ug sa pagkatapos sa iyang panaw sa pagpangalagad. Apan, panahon sa pagkabilanggo niya, nihabog, nilalom, ug nidato pa gyod ang iyang pagpangalagad sa pagsulat; ug ang mga sulat nga gisulat niya sa bilanggoan nahimong dakong panalangin sa tanang kaiglesiahan sa tanang siglo. (The Satanic Chaos in the Old Creation and the Divine Economy for the New Creation, Chapter 2)

Samtang dili ta mouyon sa hulhog ug buhat sa kaaway, nakaingon sab sa pagputli alang sa pagtukod ang mga kagubot. Dili ta magkaluya. Magmakugihon hinuon ta sa pag-amping sa pagkausa ug magkupot sa himsog nga pagtulon-an aron matukod ang Lawas ni Cristo.

“Alang man sa pagtukod sa iglesia kining tanang kagubot.” (The Experience and Growth in Life, Chapter 27)