Bag-o lang, dunay pagtulon-ang nikatap diha sa mga balaan ug kaiglesiahan nga sayop nga nigamit ug nituis sa kalabot sa pagbulot-an ug tinugyanang mga pagbulot-an. Giduso sa pipila ka magbubuhat ang herarkiyanhong estruktura sa pagbulot-an nga ang Dios maoy pagbulot-an, ang mga masigka-magbubuhat maoy tinugyanang mga pagbulot-an ubos sa Dios, ang mga anciano sa kaiglesiahan maoy tinugyanang mga pagbulot-an ubos sa mga masigka-magbubuhat, ug ubos sa mga anciano ang mga balaan sa kaiglesiahan. Himsog nga pagtulon-an ba kining herarkiyanhong pagpanguna o hangin sa pagtulon-an?
Aron matubag kining pangutanaha susihon gyod nato ang hunahuna sa Biblia kalabot sa pagpanguna diha sa katawhan sa Dios ug ang paagi sa pagpalakaw nianang pagpangunaha diha sa iglesia. Ayohon, ganiron, ug walay pagpihig gyong basahon nato ang Biblia ug ang pagpangalagad sa atong mga igsoong Watchman Nee ug Witness Lee. Magmaputli gyod ta ug ipadaplin ang garbo ug ambisyon. Sa ingon niana lang tul-id natong mahubad ang pulong sa kamatuoran (2 Tim. 2:15).
Iya sa Dios diha ni Cristo nga Kinabuhi ang Pagbulot-an
Gipahayag sa Kasulatan nga ang Dios maoy kinalabwang pagbulot-an, ug naa Niya ang tanang pagbulot-an sa uniberso (Rom. 9:21-22). Sa pagkabanhaw ug pagkayab ni Ginoong Jesus, nadawat Niya ang tanang pagbulot-an gikan sa Dios. Niingon ang Mateo 28:18 nga, “Ug niabot si Jesus ug namulong nila, nga niingon, Gihatag na Kanako ang tanang pagbulot-an sa langit ug sa yuta.” Busa, dili malalis nga sa tibuok uniberso, si Ginoong Jesus ra ang naay tanang pagbulot-an. Ang bugtong-talagsaong Mag-uuna nato mao si Ginoong Jesucristo (Buh. 5:31). Gisultian ta ni Brother Lee nga bisan kinsang nag-isip niya nga mag-uuna diha sa pahiuli sa Ginoo wala magbatasan sa kamatuoran. Kinsa man ang mag-uuna? Moingon gyod ta nga, “Si Cristo!” Wala gyod untay mangontrol sa buhat alang sa Ginoo o sa uban ba.
Ang atong Ginoong Jesucristo maoy Ulo sa Lawas, sa iglesia (Efe. 1:22b-23; Col. 1:18, 24). Kay Lawas ni Cristo man ang iglesia, tanang may kalabotan sa iglesia, lakip na ang administrasyon niini ug ang paggamit sa pagbulot-an, organico gyod, sa ato pa, iya sa kinabuhi ug naa sa kinabuhi. Nagpasabot kini nga ang pagbulot-ang gamiton sa tawo diha sa iglesia dili iyaha tungod sa posisyon niya. Mapadayag hinuon ang pagbulot-an pinaagi sa tawo nga husto tali sa Ulo ug naa sa agay sa Espiritu. Kanang tawhana ray makapadayag ug makarepresentar sa pagbulot-an sa Ginoo. Ngano man? Kay sa moagay ang kinabuhi gikan nianang tawhana, kanang kinabuhia mao ang Dios diha ni Cristo, ug naa Niya ang tanang pagbulot-an.
Makita sab ang bugtong-talagsaong pagkaulo ni Cristo sa relasyon tali sa iglesia, sa pagpangalagad, ug sa buhat. Mosuporta gyod ang kaiglesiahan sa pagpangalagad ug sa buhat, apan maklarohan gyod unta ta nga ang iglesia maoy Lawas sa Ginoo. Siya ang Ulo sa tanang butang ngadto sa iglesia (Efe. 1:22b-23). Busa, pulos alang sa iglesia, nga Lawas, ang pagpangalagad ug ang buhat. Labot pa, ang iglesia, ang pagpangalagad, ug ang buhat nagbuhat tanan segun sa prinsipyo sa Lawas, nga naglakip sa direktang tulubagon niini ni Cristo, nga Ulo, ug sa pagkadaghan sa mga nanguna. Kalabot sa relasyon sa pagpangalagad ug sa buhat sa iglesia, gitudloan ta ni Brother Lee nga:
“Dakog kalabotan sa kaiglesiahan ug ciento porsiyento nga alang sa kaiglesiahan ang pagpangalagad ug ang buhat, apan dili kini iya sa iglesia. Wala kini sa pagkontrol o paggiya ba sa iglesia kondili direkta kining gikontrol sa Ulo, ni Ginoong Jesus. Pareho ra ang prinsipyo kalabot sa kaiglesiahan. Dakog kalabotan sa pagpangalagad ug sa mga apostol ang tanang iglesia, apan wala kini sa kamot o sa pagkontrol sa mga apostol; direkta kining nailalom sa pagkaulo ni Ginoong Jesus. Dili mangontrol sa mga iglesia lokal ang pagpangalagad, ug dili mangontrol sa pagpangalagad ang mga iglesia. Pulos direktang naa sa pagkontrol sa Ulo ang iglesia ug ang pagpangalagad.” (Salin mula sa Basic Principles for the Service in the Church Lif, Ch. 4)
Kay si Cristo man ang Ulo sa Lawas, bisan unsang buhat o pagpangalagad alang gyod sa kaayohan sa Lawas sa kinatibuk-an. Nakalapas ning prinsipyoha ang pagtukod og pribadong buhat, nga moresulta sa pagpawalay-pulos sa pagkaulo ni Cristo, ingon sa gipatin-aw ni Brother Nee sa The Normal Christian Church Life:
“Giila na nga kamatuoran nga si Cristo ang Ulo sa Iglesia, apan hatagan gyog gibug-aton kanang kamatuorana kalabot sa pagpangalagad maingon man sa kinabuhi sa Iglesia. Pagpangalagad sa tibuok Iglesia, dili sa usa ka bahin lang niini, ang Cristohanong pagpangalagad. Seguradohon gyod nato nga ang Lawas ni Cristo gyoy gibasihan sa buhat nato. Kay kon dili, mawad-an ta sa pagkaulo ni Cristo.” (Ch. 2)
Seryoso nga butang ang paglapas sa pagkaulo ni Cristo. Magwala kini sa bili sa imong buhat o pagpangalagad diha sa pagtukod sa Lawas ni Cristo ug magpasaag sa katawhan sa Ginoo.
Ang Pagtulon-an sa Mga Apostol Maoy Batakang-Balaod sa Iglesia
Ang usa pa ka mahinungdanong prinsipyo kalabot sa pagpanguna diha sa iglesia mao nga ang pagtulon-an sa mga apostol, nga mao ang tibuok pagpamulong sa Dios sa Bag-ong Tugon, maoy batakang-balaod sa iglesia. Maingon nga ang kasugoan maoy sinulat nga batakang-balaod sa katawhan sa Dios sa Daang Tugon, ang pagtulon-an sa mga apostol maoy balaod sa pagdumala sa Dios sa Iyang katawhan sa Bag-ong Tugon. Sa malinawong nasod, labaw sa pangagamhanan, pamalaod, ug hukmanan ang batakang-balaod sa nasod. Maingon man sab, labaw kang bisan kinsang masigka-magbubuhat o anciano ang pagtulon-an sa mga apostol, isip batakang-balaod sa gingharian sa Dios sa Bag-ong Tugon. Tungod man niini nga gisultian ni Pablo ang batan-ong masigka-magbubuhat niya nga si Tito nga “magkupot sa kasaligang pulong, nga sumala sa pagtulon-an sa mga apostol, aron makahimo siya sa pagpanambag pinaagi sa himsog nga pagtulon-an ug makapatuo niadtong mga nisupak” (Tito 1:9) ang usa ka anciano.
Ang pagpanguna diha sa pagpangalagad sa Bag-ong Tugon labaw nga naa sa pagtulon-an sa Bag-ong Tugon kaysa mga tawong nanguna sa pagpangalagad sa Bag-ong Tugon. Mao nga gisultian ta ni Brother Lee nga, “Ang pagpangunang gipakita sa Bag-ong Tugon labi gyong naa sa mga pagtulon-an sa mga ministro, wala sa mga buhat sa mga masigka-magbubuhat” (Leadership in the New Testament, Ch. 2). Kon nibiya pa si Pedro o si Pablo ba’emng pagtulon-an, dili unta mosunod nila ang mga balaan. Nisunod sa pagtulon-an sa mga apostol ang kaiglesiahan, ug nisunod sila sa mga apostol kay naa man sa mga apostol ang pagtulon-an sa Bag-ong Tugon. Kon naay mga problema sa iglesia nga gidumala sa mga anciano, maingon nga tun-an gyod ang kasugoan sa Daang Tugon, tun-an sab gyod nato ang pagtulon-an sa mga apostol, nga batakang-balaod nato sa Bag-ong Tugon.
“…Dili gyod ta moingon nga alang ta sa usa ka butang o supak ba niini kon wala pa ta makabasa sa batakang-balaod sa Bag-ong Tugon aron makita kon unsay giingon niini. Dunay problema ngani nga motumaw, kat-onan gyod nato nga maghilom ug mobasa sa sinulat nga Pulong sa Dios, sa batakang-balaod sa Bag-ong Tugon, nga walay bisan unsang opinyon…” (Ch. 3)
Dili gyod nato ilhon nga mga nanguna ang mga tawo kansang pagtulon-an sukwahi sa o wala maglakip sa kinatibuk-ang pagtulon-an sa mga apostol. Sa ato pa, ilhon gyod nato kon nitakdo ba sa pinadayag sa Bag-ong Tugon ang mga pulong sa mga niingon nga mga mag-uuna sila.
Kon walay sulbad nga nasulat sa Bag-ong Tugon, nga wala mosukwahi sa Bag-ong Tugon, mangita gyod ta sa hunahuna sa atong Ulo. Ang panahon ug paagi sa pagpatuman sa sinulat nga batakang-balaod nagkinahanglan gihapon sa dihadihang paggiya sa Ginoo, nga naggikan sa direktang pakig-ambitay sa Ginoo ug sa pakig-ambitay sa ubang bahin sa Lawas. Apan, matin-awan gyod unta ta nga dili magkasumpaki ang pagtulon-an sa mga apostol ug ang dihadihang paggiya sa Ginoo; maghingpitay hinuon kini sa usag usa.
Dunay Mga Tinugyanang Pagbulot-an ang Dios
Bisan ang Dios maoy kinalabwang pagbulot-an, nagtinguha gyod Siya nga itugyan ug marepresentahan ang Iyang pagbulot-an dinhi sa yuta. Niingon ang Genesis 1:26 nga,
“Ug niingon ang Dios, Buhaton Nato ang tawo sa Atong dagway, segun sa pagkasama Nato; ug pabut-on sila sa mga isda sa dagat ug sa mga langgam sa langit ug sa mga hayop ug sa tibuok yuta ug sa tanang butang nga nagkamang sa yuta.”
Ang pagpabuot sa Dios sa tawo sa tibuok yuta nagpahamutang sa prinsipyo nga nagtinguha Siya nga ipalakaw ang Iyang pagbulot-an pinaagi sa mga tawong nagpadayag Niya. Sa tibuok kasaysayan, gigamit sa Dios ang mga tawo sa Daang Tugon sa pagrepresentar sa Iyang pagbulot-an dinhi sa yuta. Naglakip kini nila ni Noe (9:1-6), Jose (41:40-44), Moises (Exo. 3:10-18a; 4:16; 7:1), ug David (1 Sam. 16:12-13). Sa Bag-ong Tugon, gihatag sa Amahan ni Ginoong Jesus ang tanang pagbulot-an sa langit ug sa yuta (Mat. 28:18). Sa pagkayab sa Ginoo, gipadala Niya ang Iyang mga tinun-an isip mga apostol aron mahimong mga embahador Niya (2 Cor. 5:20; Efe. 6:20; 2 Cor. 10:8; 13:10) ug pinaagi nila nagpahalunag mga anciano isip mga maglalantaw sa kaiglesiahan nga morepresentar Niya (Buh. 14:23; Tito 1:5; Buh. 20:17, 28; 1 Ped. 5:5).
Morepresentar Lang ang Mga Tawo sa Pagbulot-an, Dili Manag-iya sa Pagbulot-an
Bisan gitugyan ni Ginoong Jesus sa mga tawo ang Iyang pagbulot-an, ang usa ka butang nga ipatin-aw gyod mao nga makarepresentar lang ang mga tawo sa pagbulot-an sa Dios. Ang pagtugyan sa Dios sa pagbulot-an Niya ngadto sa mga tawo dili man kay gibiyaan Niya kini ug gihatag sa uban. Sama ra kini sa embahador nga nirepresentar sa pangulo sa iyang nasod sa langyaw nga yuta. Gitugyan lang kaniya ang pagbulot-an ug bawion kini sa pabalikon na siya sa iyang nasod. Gikuptan gyod sa Mateo 28:18 ang kamatuoran nga si Ginoong Jesus ray naay tanang pagbulot-an. Kon naa sa Ginoo ang tanan, nan wala gyoy iya sa tawo. Segun sa giingon ni Brother Watchman Nee,
“Walay iyaha gyong pagbulot-an ang tawo, ug walay makatudlo sa iyang kaugalingon nga mahimong pagbulot-an. Dili mahimong balaod sa uban ang personal nga mga opinyon nato, ug dili angayan tahoron sa uban ang atong mga ideya, mga panlantaw, ug mga sugyot. Ang makapaangayan sa tawo nga morepresentar sa Dios mao ang pagkaila niya sa Dios. Nahimong pagbulot-an ang tawo tungod sa pagkasayod niya sa kabubut-on sa Dios, sa salabotan sa Dios, ug sa mga hunahuna sa Dios. Dili mahimong pagbulot-an ang tawo basi sa kaugalingon niyang mga ideya o opinyon, kondili sa pagsabot niya sa kabubut-on ug tinguha sa Dios. Dili siya makalaom nga mopasakop ang uban sa kaugalingon niyang kabubut-on o opinyon. Asa kutob siya makarepresentar sa pagbulot-an nag-agad kon asa kutob ang pagkasayod niya sa kabubut-on ug mga hunahuna sa Dios.”
(Authority and Submission, Ch. 12)
Ang Mga Basihanan sa Espirituhanong Pagbulot-an
Unsaon man diay nga mahimong pagbulot-an ang tawo? Kinsa may maisip nato nga mga tawo sa pagbulot-an? Sa basahong Authority and Submission, gipakig-ambit ni Brother Watchman Nee ang duha ka basihanan sa espirituhanong pagbulot-an: pinadayag ug pagkabanhaw.
Nagpasabot ang pinadayag sa direktang iya-sa-kasinatiang pagkaila sa Dios ug sa Iyang walay kataposang plano ingon sa gipadayag sa Biblia. Gibasi ang espirituhanong pagbulot-an sa pagkadawat sa tawo og pinadayag gikan sa pulong sa Dios. Girepresentahan ni Moises ang Dios ngadto ni Faraon human mopakita si Jehova kaniya sa nagsigang sampinit (Exo. 3:2, 6, 10). Naggikan ang pagbulot-an ni Moises sa pinadayag ni Jehova sa Bukid sa Horeb. Sa Bag-ong Tugon, ang gibasihan sa pagbulot-an sa mga apostol mao ang ilang pagtulon-an, nga sumala sa pinadayag sa pamatigayon sa Dios (Rom. 16:25; Gal. 1:11-12, 15-16; Efe. 3:3). Naggikan sa pulong sa Dios ang pagbulot-an! Busa, diha sa iglesia, naay pagbulot-an ang tawo basta nitakdo ang pagtulon-an niya sa pagtulon-an sa mga apostol kalabot sa pamatigayon sa Dios sa Bag-ong Tugon (Buh. 2:42: 1 Tim. 1:3-4; Tito 1:9).
Usa pa ka mahinungdanong basihanan sa pagbulot-an ang pagkabanhaw. Sa Genesis 1:26, nag-una sa pagbuot ang dagway ug pagkasama, nga may kalabotan sa pagpadayag sa Dios. Nagpakita kining prinsipyoha nga naggikan sa pagpadayag sa diosnong kinabuhi ang pagbulot-an. Ang sugilanon sa namutot nga sungkod ni Aaron sa Numeros 17 maayo kaayong hulagway sa pagkabanhaw nga maoy gibasihan sa pagbulot-an. Sa dihang nisupil ang mga anak nga lalaki ni Kora ug gihagit ang pagpanguna ni Moises ug Aaron, gipakuha sa Dios si Moises og sungkod (nga nagsimbolo sa pagbulot-an) gikan sa dose ka banay ug ibutang kini atubangan sa Arka sa tabernaculo (Num. 17:1-5). Pagkasunod adlaw, nakita ni Moises nga namutot, namulak, ug namungag hinog nga mga almendras, nga naghulagway sa pagkabanhaw, ang sungkod ni Aaron. Patay nga mga tukog ang dose ka sungkod. Apan nagpalugwag kinabuhi ang sungkod ni Aaron. Kini ang pagkabanhaw.
Sa Authority and Submission, gipahinumdoman ni Watchman Nee ang mga masigka-magbubuhat nga’emng kaugalingon wala gyod silay pagbulot-an. Niingon siya nga, “Kamatayon ra gyoy ikapasundayag sa uga nga sungkod. Apan kon naa kay pagkabanhaw, naa kay pagbulot-an, kay nag-agad man sa pagkabanhaw ang pagbulot-an, wala sa natural nga kinabuhi. Natural ang tanang naa nato. Busa, wala mag-agad nato ang pagbulot-an kondili sa Ginoo” (250-251). Niingon ang Ginoo mismo nga Siya ang pagkabanhaw (Juan 11:25). Persona ang pagkabanhaw. Busa, naggikan ang pagbulot-an sa tawo sa paghikap niya sa persona ni Ginoong Jesus, nga mao ang pagkabanhaw. Ang hustong pagpanguna ug pagpalakaw sa espirituhanong pagbulot-an naa gyod sa ginsakpan sa pagkabanhaw.
Ang Pagpadayag sa Pagbulot-an
Unsaon man nga mapadayag ang espirituhanong pagbulot-an? Niingon ang Biblia nga dili magharihari sa katawhan sa Dios kadtong dunay espirituhanong pagbulot-an (1 Ped. 5:3a; Mat. 20:25-26a). Mga sumbanan hinuon sila sa panon sa pagkinabuhi nila ngadto sa Ginoo ug sa pagsunod sa Iyang sumbanan nga moalagad sa Iyang katawhan ingog mga ulipon. Niingon ang Marcos 10:42-45 nga:
“Nahibalo mo nga ang gitahod nga mga magbubuot sa mga Gentil nagharihari nila, ug nagbuot nila ang ilang mga labaw. Apan dili kini ingon niana diha ninyo; bisan kinsa hinuoy buot mahimong labaw diha ninyo mahimong sulugoon ninyo, ug bisan kinsang buot mag-una diha ninyo mahimong ulipon sa tanan. Kay bisan ang Anak sa Tawo wala moanhi aron alagaran, kondili aron moalagad ug mohatag sa Iyang kinabuhi nga lukat alang sa daghan.”
Basi ning mga versiculoha, sa seksyon nga giulohag “Dili Modominar o Mokontrol ang Pagbulot-an kondili Mopaubos hinuon aron Moalagad,” gisultian ni Brother Nee ang iyang mga masigka-magbubuhat:
“Wala gyod untay pagpanlimbasog nga molabaw diha sa mga anak sa Dios. Wala gyod untay hunahuna nga makigbisog alang sa gahom o sa tuyo ba nga mangontrol sa uban. Kon buhaton nato kini, masama ta sa mga Gentil. Walay labaw pa kangil-ad sa tawong nakigbisog nga mahimong pagbulot-an. Labing ngil-ad gyod kanang maningkamot ang tawo nga dayag nga mangontrol sa uban. Ang ambisyon nga mahimong pagbulot-an o mabantogan ba iya man sa mga Gentil. Abogon gyod nato kining espirituha gikan sa iglesia.” (Authority and Submission, Ch. 18)
Ang natural nga tawhanong hunahuna kalabot sa mag-uuna tawo man nga labaw sa uban. Apan, lahi ang gipadayag sa Biblia, ingon sa makita sa Mateo 20 ug 23. Dili labaw sa uban ang mga mag-uuna; ubos hinuon sila. Mga ulipon ang mga mag-uuna. Sa Biblia, nagpasabot og pagkaulipon ang pagpanguna. Andam gyong mohinlo sa kasilyas, molimpyo sa salog, mopahaluna sa mga lingkoranan, ug moalagad ingog tig-abiabi ang mag-uuna.
Kalibotanon og iya-sa-organisasyon ang hunahuna nga mogamit og pagbulot-an diha sa iglesia ang mga masigka-magbubuhat o mga anciano ba. Kalim-an ka tuig kanhi gisultian ta ni Brother Lee nga, “Dakong sayop gyod ang magbuot sa uban diha sa iglesia. Walay labaw kamakauulaw niini. Dili mahimayaon kanang magbuot ta sa mga balaan—makauulaw kini” (Salin mula sa Life-study of Ezekiel, p. 119). Basi sa ilhanan sa Bag-ong Jerusalem nga kahingpitan sa buhat sa Dios, nisulti si Brother Lee kalabot sa paggamit sa mga anciano og pagbulot-an diha sa iglesia:
“Dili gyod gamiton sa mga anciano ang ilang pagka-anciano pinaagig pagbulot-an. Gamiton gyod ang pagkaanciano, sa ato pa, ang pagrepresentar sa pagkaulo, pinaagi sa agay sa kinabuhi. Bisan trono sa pagbulot-an ang trono, ang trono sa pagkaulo, niagay gikan niini ang suba sa tubig sa kinabuhi. Kon motan-aw ka sa trono, makita nimo ang pagbulot-an ug ang pagkaulo. Apan kon motan-aw ka sa suba, makita nimo ang tubig sa kinabuhi ug ang kahoy sa kinabuhi. Nagpakita kini nga ang hustong pagkaanciano dili pagbuot sa uban; pagpaagay kinig kinabuhi ngadto nila. Naghari ta, apan wala ta maghari pinaagig pagbulot-an; naghari ta pinaagi sa pag-agay sa kinabuhi sa sulod.” (Life-study of Revelation, Ch. 66)
Hinumdoman gyod nato ang positibong mga sumbanan sa atong Ginoong Jesus ug sa Iyang mga apostol ug ang negatibong panig-ingnan ni Saul. Sa Juan 12:13 gisugat sa dakong panon sa katawhan ang Ginoo nga nipahayag nga Siya ang “Hari sa Israel.” Apan, dili kana ang tahas sa Ginoo. Sa sunod nga capitulo, nibarog Siya sa posisyon sa sulugoon, nanghugas sa mga tiil sa Iyang mga tinun-an (13:1-11). Sa naglalisay ang Iyang mga tinun-an kon kinsay morag labing dako nila, gisultian Niya sila nga, “Himoa…[nga] sama sa kamanghoran ang labing dako ninyo, ug sama sa nag-alagad ang nangulo” (Luc. 22:26). Maingon man sab, gisultian ni Pablo ang mga taga-Corinto nga, “Dili kay nagharihari mi sa inyong pagtuo, kondili mga masigka-magbubuhat mi uban ninyo alang sa inyong kalipay” (2 Cor. 1:24). Gisultian niya ang mga taga-Filipos nga nagkalipay siya nga “ibubo…ingon nga halad nga ilimnon nganha sa halad ug pag-alagad sa inyong pagtuo” (Fil. 2:17). Sa laing bahin, nagtinguha si Saul nga magtukod sa kaugalingon niyang monarkiya diha sa katawhan sa Dios, sa gingharian sa Dios. Tungod sa mapahitas-ong pagsupil niya, gikuha kaniya ang pagkahari ug gihatag kang David, nga tawong uyon sa kasingkasing sa Dios (1 Sam. 13:13-14). Nakakita tag mga igsoon matag karon ug unya nga naningkamot sa pagtukod og personal nga mga gingharian sulod sa kaiglesiahan, sa pagbuhat nga nakig-indigay ug nagtinguha sa pagtukod og pribadong mga teritoryo o mga sumusunod alang sa kaugalingon nilang buhat. Sa ngadto-ngadto, sama ni Saul, dili gyod itugot sa Dios kanang butanga, nga makadaot gyod sa mga nagbuhat niini (Fil. 2:3; Sant. 3:14-16).
Salamat sa Ginoo sa mga gasa nga gipahamutang Niya sa Lawas. Apan bahin lang sa Lawas ang matag magtutuo. Busa, isalikway gyod nato ang bisan unsang hunahuna sa ranggo ingon sa gibatasan sa kalibotan. Dili gyod unta mag-isip ang masigka-magbubuhat nga labaw siya sa mga anciano. Dili gyod unta mag-isip ang anciano nga labaw siya sa uban, o mag-isip ba ang diacono nga ubos siya sa mga anciano. Dunay kagamitan diha sa Lawas ang matag usa ug nagbuhat sa iyang kaakohan sa paagi sa panag-ambitay, dili sa herarkiya.
Ang Pagka-dili Permanente sa Pagpanguna
Gipakita sa Bag-ong Tugon kanato nga dili kalabot sa pagkupot og permanenteng posisyon ang pagpanguna diha sa iglesia. Nanudlo ang Simbahang Romano Catolico nga gitudlo ni Cristo si Pedro nga mahimong bugtong-talagsaong pangulo sa tibuok iglesia. Kini tungod kay nag-una man ang iyang ngalan sa Mga Ebanghelyo ug sa Mga Buhat. Apan niingon ang Galacia 2:9 nga, “Si Santiago ug si Cefas (Pedro) ug si Juan, nga giila nga mga haligi.” Gibadlong man ngani ni Pablo si Pedro atubangan sa tanan sa Galacia 2:14 sa nakita niya nga wala magtarong sa paggawi si Pedro kalabot sa kamatuoran sa ebanghelyo. Ang espirituhanong kapasidad ni Pedro niadtong panahona menos gyod sa kang Santiago. Mao nga unang gihisgotan si Santiago. Sa pagkatinuod, kay “gikan ni Santiago” man ang mga igsoon, si Santiago ang representante sa iglesia sa Jerusalem niadtong panahona. Makita sab kini sa Mga Buhat 21:17 ug 18, “…Nisulod si Pablo uban namo ngadto ni Santiago, ug didto ang tanang anciano.” Wala moadto ni Pedro si Pablo ug ang iyang mga masigka-magbubuhat; niadto hinuon sila ni Santiago. Sa kataposan, sa Mga Buhat 15, sa conferencia sa mga apostol ug mga anciano, si Pedro ang unang namulong, unya si Pablo. Dili ang nanguna maoy unang mamulong, kondili sa ulahi na siya. Ulahing namulong si Santiago, nga representante sa iglesia sa Jerusalem.
Makat-on ta gikan niini nga dili opisyal, permanente, o iya-sa-organisasyon ba ang pagpanguna diha sa mga anak sa Dios. Nag-agad kini sa espirituhanong kapasidad. Ang labing dakog kapasidad maoy manguna. Ug naa tingali sa usa ka brother karon kanang kapasidara, apan sa ubang panahon naa kini sa laing brother. Sa adlaw sa Pentecostes, si Pedro ang labing dakog kapasidad; apan sa Mga Buhat 15, si Santiago na. Sa pagkatinuod, nahulma ang pagpanguna tungod sa pagtubo sa kinabuhi ug lugwa kini sa panginahanglan. Kon walay panginahanglan, dili na ipadayag pa ang pagpanguna. Matahom kaayo nga gitudlo sab kini sa Dios sa ingon niini aron mapadaplin ang hunahuna sa tawo kalabot sa pagpanguna.
Usa ka Panig-ingnan Giunsa Pagbatasan ni Pablo ang Kamatuoran Kalabot sa Pagpanguna
Niingon ang 1 Corinto 16:12 nga, “Ug mahitungod sa atong igsoon nga si Apolo, kadaghan na nako siya giawhag nga moanha ninyo uban sa mga igsoon; apan dili pa gyod siya gustong moanha karon….” Dinhi wala sugoa ni Pablo si Apolo kondili giawhag lang, kay nasayod man siya nga dili siya ang tinuod nga nanguna. Bisan giawhag ni Pablo si Apolo, duna gihapoy kagawasan si Apolo, ug wala mangontrol si Pablo sa buhat sa Ginoo.
Wala gyod sukad mangangkon si Brother Lee nga siyay nanguna sa pahiuli sa Ginoo. Wala gyod siya sukad manugo sa mga iglesia o sa mga balaan ba kalabot sa buhaton nila. Kadaghan hinuon nihangyo niya ang mga anciano sa nagkalainlaing iglesia nga sultian sila kon unsay buhaton, apan kanunay gyod siyang moingon nila nga moampo sa Ginoo ug magpagiya Niya.
“…Walay organisadong pagpanguna diha sa pahiuli sa Ginoo. Sa nibiya mi sa mga denominasyon dugay na, labi gyong gibiyaan namo ang herarkiya, ang organisasyon….Dunay usa ra ka Ulo, walay daghang ubos nga ulo. Dunay usa ra ka Ulo nga direktang nagsugo sa tanang bahin, dili pinaagi sa ubos nga mga ulo….” (Leadership in the New Testament, Ch. 1)
Makasusubo, nga segun sa kasaysayan sa iglesia, sa nisimang na ang mga tawo gikan sa pulong sa Dios, niyuhot pagsulod ang herarkiya, ug dunay pipila nga nagpakamag-uuna. Kay daghan man kaayo ang naa sa kangitngit ug wala magbatasan sa kamatuoran, gipasagdan kini. Mahayagan unta tang tanan aron makakita sa kamatuoran kalabot sa pagpanguna.
Ang Pagkadaghan (Plurality) sa Pagpanguna
Ang usa pa ka importanteng butang kalabot sa pagpanguna mao ang pagkadaghan. Sa Bag-ong Tugon, sa sinugdan dunay dose ka apostol ug pipila ka anciano. Nagpakita ang pagkadaghan nga dili permanente ang pagpanguna diha sa iglesia. Apan, bisan daghan, dunay usa ra ka bugtong-talagsaong pagpanguna kay usa ra man ang pagpangalagad (Buh. 1:17, 25). Ug kay usa ra man ang Dios, usa ra ang Ginoo, usa ra ang Espiritu (Efe. 4:4-6), unsaon man pagkalabaw sa usa sa pagpanguna? Nabahin karon ang Cristianidad kay daghan man kaayong pagpanguna.
Mapaubsanong Magpasakop sa Usag Usa ang Tanan
Sa makita na ang kamatuoran kalabot sa pagpanguna, tan-awon nato karon ang usa pa ka aspeto niini. “Mosugot mo sa mga nanguna ninyo ug magpasakop nila, kay nagtukaw sila sa inyong kalag ingon sa mga tawong mohatag og husay, aron mabuhat nila kini uban ang kalipay ug dili ang pag-agulo; kay dili man kana makaayo ninyo” (Heb. 13:7). Sa usa ka bahin, dili gyod magbuot nato ang mga anciano. Sa laing bahin, isip mga magulang ug mas sinati, nanguna sila ug mosunod gyod ta nila. Nagpasabot og pagsunod ang pagsugot dinhi. Bisan niingon si Pedro nga dili gyod magharihari ang mga anciano sa panon sa Dios kondili mahimo hinuong mga sumbanan sa panon (1 Ped. 5:3), giingnan sab niya ang mga batan-on nga magpasakop sa mga anciano (v. 5).
Dunay mga panahon sab nga magpasakop gyod sa mga batan-on ang mga magulang. Niingon si Pedro nga, “Ug baksi ninyong tanan ang inyong kaugalingon og pagkamapaubsanon ngadto sa usag usa” (v. 5b). Busa, kat-onan gyod sa tanan nga mapaubsanong magpasakop sa usag usa. Matahom kini nga estruktura, nga lahi kaayo sa hulog nga natural nga batasan.
Ang Aktwal nga Pagpanguna
Ang pagpanguna diha sa mga iglesia lokal dili man sa usa ka tawong nagkontrol. Dili sab kini iya-sa-posisyon. Walay herarkiya sa mga nanguna diha sa pahiuli sa Ginoo o sa kaiglesiahan ba. Nan, kinsa man diay ang nagkontrol nato diha sa kaiglesiahan? Ang pinadayag gyoy mokontrol. Kini gyod ang pinadayag nga gitudlo sa mga apostol. Kini ang pamatigayon sa Dios sa Bag-ong Tugon, nga magpaambit sa Dios nganha sa Iyang katawhan aron maanaay Lawas ni Cristo nga magpadayag Niya nga mahingpit sa kompletong walay kataposang pagpadayag Niya sa Bag-ong Jerusalem (Buh. 2:42; 1 Tim. 1:3-4). Giunsa man pagkontrol ning pinadayaga? Pinaagi sa mga nagpadangat sa pinadayag, sa mga ministro. Mokontrol ang pinadayag, ug mokontrol kini pinaagi sa mga nagpadangat niini. Kini ang pagpanguna diha sa pagpangalagad sa Bag-ong Tugon. Sa Marso 24, 1997, niingon si Brother Lee nga gipakita sa Ginoo kaniya nga nag-andam na Siyag daghang brother nga moalagad ingog mga masigka-ulipon niya sa nasakot nga paagi. Gibati niya nga kini ang takdo-sa-panahon nga paagi sa pagtuman sa pagpangalagad sa pagtukod sa Lawas ni Cristo ug paghingpit sa Bag-ong Jerusalem. Kini ang tinuod nga pagpanguna diha sa pahiuli sa Ginoo karon.