Nagpasalamat ta sa Ginoo sa Iyang mga kaluoy nga maanaa ta sa Iyang pahiuli karon. Ang pahiuli sa Ginoo mao ang sentrong buhat sa Dios sa pagtukod sa iglesia nga Lawas Niya aron mapalugwa ang bag-ong tawo ug maandam ang pangasaw-onon aron mapadali ang Iyang pagbalik. Kay nakatandog man kini sa naa sa kahiladman sa kasingkasing sa Dios, labi gyod kining gidumtan sa kaaway ug buhaton niya kutob sa iyang mahimo nga madaot ug malaglag kini. Sa tibuok kasaysayan nato, nakaagi na tag daghang kagubot. Niresulta kini sa labihang pagkadaot ug kapildihan, apan sa samang higayon nagputli sa Iyang pahiuli samtang naglig-on sa pagtuo nato sa Ginoo ug sa pagsubay nato ning dalana. Tungod niini, nitakdo ang atong kasaysayan sa kasaysayan sa katawhan sa Dios sa Daan ug Bag-ong Tugon (Pagbansay sa Mga Anciano, Ikanapulong Basahon: Ang Pagkaanciano ug ang Paaging Gitudlo sa Dios (2), cap. 1).
Sa pag-atubang sa matag-karon-ug-unya nga kagubot, pagkaawaaw, ug satanasnong dakong kasamok diha sa iglesiahanong kinabuhi, unsa may atong tinagdan? Sa Mga Buhat 20:29-30, gisultian ni Pablo ang mga anciano sa iglesia sa Efeso nga makasagubang gyod silag pagsupak sa gawas ug pagbingkilay sa sulod. Labot pa, sa sulat niya kang Timoteo, gitagna na ni Pablo nga madaot ang iglesia ug mahitabo ang pagsupak (1 Tim. 4:1; 2 Tim. 3:1; 4:3). Gisugo niya si Timoteo—ug kita sab—nga awayon ang maayong pagpakig-away nga iya sa pagtuo (1 Tim. 6:12). Andam gyod unta tang makigbisog alang sa pagtuo (Judas 3; 1 Ped. 3:15) ug makig-away sa lahing mga pagtulon-an nga sukwahi sa pamatigayon sa Dios diha sa pagtuo (1 Tim. 1:3-4).
Makig-away gyod ta; apan unsa man ang hustong inawayan? Motubag gyod ta, apan unsa man ang hustong tubag? Niingon ang 2 Timoteo 2:5 nga makigsangka gyod subay sa mga lagda ang magsasangka, ug gisultian ta ni Pablo sa 1 Corinto 9:25 nga magpugong ta sa kaugalingon sa makigsangka ta. Mapalgan tingali nato nga duna tay kusganon ug matarong nga tinguha nga manalipod sa pahiuli sa Ginoo ug mosukol ta sa mga nisupak, apan kat-onan gyod nato nga mohunong una ug magtagad pag-ayo kon unsang matanga ta sa magsasangka. Ipadayag nato dinhi ang pipila ka prinsipyo ug ang hustong mga paagi sa pagtagad sa mga unos diha sa iglesiahanong kinabuhi.
Moaway sa Espirituhanong Away
Ang pagtagad sa pagsupak o pakigbingkil naglambigit og espirituhanong away. Ning mga adlawa gikinahanglan gyod pag-ayo ang mga makig-away alang sa kamatuoran. Makaamgo gyod unta ta nga gitugot sa Ginoo ang mga panahon sa kagubot aron makat-on ta nga mobulig Niya ning awaya. Ang pagpakig-away sa espirituhanong away pagpangandam man nga mahimong bahin sa madaogong kasundalohan sa Ginoo sa Iyang pagbalik (Bug. 17:14; 19:14).Matod pa sa Efeso 6, iya sa Lawas ang espirituhanong away. Tungod niana likayan gyod nato nga mabulag sa usag usa ug sa Lawas sa kinatibuk-an. Labot pa, gipakita sa Efeso 6 kanato nga aron makaaway ning awaya magpagahom gyod ta diha sa Ginoo ug sa gahom sa Iyang kusog ug magpahitsas sa pagsul-ob nato sa tibuok hinagiban sa Dios (v. 10-11, 13). Makahuloganon nga halos tanang bahin sa hinagiban nga gihisgotan sa Efeso 6 alang man sa pagpanalipod. Nagpasabot kini nga panalipdan gyod una nato ang atong kaugalingon sa mga pangataki ni Satanas. Baksan gyod nato ang atong hawak sa kamatuoran, nga dili doktrina lang kondili realidad sa Dios diha ni Cristo sa adlaw-adlawng pagkinabuhi nato (v. 14a). Isul-ob gyod nato ang tabon-sa-dughan sa pagkamatarong aron matabonan ang atong konsensya gikan sa mga pangakusar ni Satanas sa pagsalig nato sa dugo ni Cristo ug pagsulbad sa bisan unsang sala nato sa Dios ug sa tawo (v. 14b). Dawaton gyod nato ang ebanghelyo sa pakigdait, ang pakigdait nga gihimo ni Cristo tali sa tanang tawo pinaagi sa krus, isip lig-ong patukoranan nato aron makabarog ta (vv. 15; 2:15-17). Magamit dayon nato ang kalasag sa pagtuo sa pagpalong sa tanang nagdilaab nga udyong—sa mga pangakusar, mga pangutana, mga bakak, mga popasangil, ug uban pa—sa daotan (6:16), maingon man ang salukot sa kaluwasan nga manalipod sa atong salabotan batok sa mga hulga ug mga kabalaka nga nihasmag nato (v. 17a).
Kon nahitsasan ta sa ingon niini, epektibo na natong magamit ang espada sa Espiritu sa pagpatay sa kaaway sa Dios (vv. 17b-18). Kining espada, nga mao ang pulong sa Dios, mao ray hinagibang pang-asdang diha sa hinagiban sa Dios, ug magamit nato kini pinaagi sa pag-ampo. Ang labing maayong paagi sa pagpakig-away mao ang pag-ampo. Ang atong pakiglayog dili batok sa unod ug dugo, kondili batok sa mga magbubuot ug mga pagbulot-an ug sa espirituhanong pwersa sa daotan diha sa kalangitan (Efe. 6:12). Busa, espirituhanon sab gyod ang mga hinagiban nato. Gikinahanglan nato ang espada sa Espiritu, ang Espiritu nga mao ang pulong sa Dios, ug gamiton nato kini pinaagi sa pag-ampo ug pagpangamuyo (Efe. 6:17-18). Moampo ngani tag kusganong mga pag-ampo nga gibasi sa Pulong sa Dios, makabarog ta batok sa yawa ug mabuntog nato siya. Naghunahuna tingali ta nga pukanon gyod ang mga magsusupak, apan ang tinuod nga kaaway si Satanas man nga nagpuyo sa unod sa tawo ug nagpasulod sa iyang kaugalingon sa salabotan sa tawo aron mamulong ug mobuhat og mga butang nga makadaot sa iglesia. Nakaamgo ba mo nga nagpuyo si Satanas sa atong unod (Rom. 7:17-18, 20, 23). Sa pagkatinuod, dili man mga tawo ang naghulhog sa mga kagubot diha sa iglesia kondili si Satanas. Dili ta makapildi niya ginamit ang unodnong mga paningkamot nato; ang bugtong paagi mao ang pag-ampog mga pag-ampong nakig-away. Taliwala sa kagubot, magmatukawon ta sa pag-ampo (Mat. 26:41; Luc. 18:1; 1 Tes. 5:17), nga dili lang magbantay sa unod sa uban, kondili sa atong unod sab.
Dili Magmabingkilon
Niingon ang 1 Timoteo 2:8 nga, “Busa nagtinguha ko nga mag-ampo ang mga tawo sa tanang dapit, nga magbayaw sa balaang mga kamot, sa walay kaligutgot ug pangatarongan.” Dili ta makaampo kon naa tay kaligutgot ug pangatarongan, kay mopatay man kini sa atong pag-ampo. Kon makita nato ang tinuod nga espirituhanong away, makaamgo ta nga dili makasulbad og bisan unsa ang pakigbingkil. Ang pagpakigbisog alang sa pagtuo wala magpasabot nga magmabingkilon ta. Ang magmabingkilon pagpakiglantugi man ug pagpakig-away ug pagpakiglalis ug pagpangatarongan, nga moresulta sa kasina, panag-away, mga pagdaot, ug daotang mga katahap (1 Cor. 11:16; 1 Tim. 6:4; 2 Tim. 2:14, 23). Gisultian ta sa Tito 3:9 nga “likayi ang binuang nga mga pagpangutana ug ang pagsubay sa talaan sa mga ginikanan ug mga pagbingkilay ug panaglalisay bahin sa kasugoan, kay dili kana mapuslanon ug kawang.”
Taliwala sa unos, duna tingaliy kusganong mga opinyon ang tawo kalabot sa husto ug sayop, ug nagtinguha tingali siyang moprangka og sulti ug makiglalis sa uban. Sayon ra ang pagsultig negatibo kalabot sa uban; dili tingali ta modiretsog sulti. Gamhanang galamiton karon ang social media sa pagpakaylap og mensahe ug dili gihapon ka mailhan. Mosulti tingali tag mabingkilong pulong sa usa ka tawo ug mokaylap kini samag kagaw ngadto sa usa ka gatos o usa ka libo ka tawo sa usa lang ka adlaw. Makadaot sa mga balaan kanang pagpamulonga. Bisan pag “husto” ta, walay positibong resulta ang atong pagpamulong. Kon pasipad-an ta, dili gyod ta mobalos og pagpasipala (1 Ped. 2:23, 3:9; 1 Tes. 5:15). Makatakod ang masupilong espiritu. Kon mobalos tag pagpasipala kon pasipad-an ta sa uban, mawad-an ta sa hustong baroganan diha sa atong espiritu nga motabang sa mga balaan (Luc. 9:55; Heb. 4:12; 1 Juan 4:1).
Imbis magmabingkilon, gisultian ta sa Biblia nga magmalumo (Tito 3:2; Mat. 5:5; 11:29). Gipahinumdoman ta sa 2 Timoteo 2:24-25 nga “magmalumo hinuon ngadto sa tanan…mapailobon sa mga sayop; sa kalumo magtul-id sa mga nisupak, basin pag hatagan sila sa Dios og paghinulsol ngadto sa hingpit nga pagkaila sa kamatuoran.” Sumbanan si Moises sa tawong malumo ug mapaubsanon (Num. 12:3). Sa dihang namulong sila si Aaron ug Meriam batok niya sa Numeros 12, walay gisulti o gibuhat ba si Moises sa pagpanalipod sa iyang kaugalingon. Duna siyay katungod ug posisyon nga momatarong sa iyang kaugalingon isip tawo nga gitudlo sa Dios nga manguna sa Iyang katawhan, apan wala niya kini buhata. Giampo hinuon ni Moises si Meriam (v. 13). Sa kataposan, ang Dios maoy nimatarong ni Moises ug nipahamtang sa iya-sa-pangagamhanang silot Niya sa mga nisupak niya. Maingon man sab, dili gyod ta momatarong sa atong kaugalingon. Ituboy lang hinuon nato ang ngalan, pangagamhanan, pagkamatarong, ug himaya sa Dios; ug iampo nato ang mga nisupak nga mahigawas unta sila sa nagbuta nga buhat sa kaaway sa Dios.Dili Magmatarong sa Kaugalingon
Magdala nato ang sumbanan ni Moises ngadto sa usa pa ka importante kaayong prinsipyo, sa ato pa, magdumili sa kaugalingon ug dili magmatarong sa kaugalingon. Kon kasab-an, supakon, ug atakihon ta sa uban, dili gyod nato matarongon o ipanimalos ba ang atong kaugalingon. Niingon ang Roma 12:19 nga, “Ayaw ipanimalos ang inyong kaugalingon, mga hinigugma, hatagi hinuog luna ang kapungot sa Dios, kay nasulat na, ‘Akoa ang pagpanimalos; manimalos Ko, niingon ang Ginoo.’” Iya sa Dios ang pagpanimalos (Deut. 32:35; Heb. 10:30).
Kaakohan sa Dios ang pagpatuman sa Iyang pagkamatarong ug sa iya-sa-pangagamhanang pagtagad Niya alang nato; busa, dili na nato ipanimalos pa ang atong kaugalingon. Gipamatud-an ug gimatarong sa Dios ang pagkasacerdote ni Aaron pinaagi sa sungkod nga nanalingsing (Num. 17:1-13). Gimatarong sa Dios ang pagpanguna ni Moises taliwala sa pagsupil sa katawhan (Num. 12; 16). Sa tibuok kasaysayan sa mga anak Israel, kanunay silang gimatarong sa Dios atubangan sa tanang nasod nga nisupak nila (Deut. 32:43, nota 1). Si Ginoong Jesus mismo wala gyoy gibuhat sa pagmatarong sa Iyang Kaugalingon, apan ang Amahan maoy nagmatarong Niya sa tibuok yutan-ong pagpangalagad Niya ug bisan ngani sa pagkalansang Niya sa krus ug pagkabanhaw (Mat. 3:16-17; 17:5; Buh. 5:31; Rom. 1:3-4; 1 Tim. 3:16). Sa dihang gisulayan Siya, wala gyod Siyay gisulti aron manalipod sa Iyang Kaugalingon. Nagtindog lang Siya ingog karnero atubangan sa mga nagsumbong Niya (Mat. 26:62; 27:12; Mar. 15:5). Nisunod sab ang mga apostol sa sumbanan sa Ginoo nga sa gipasipad-an sila, wala sila mobalos sa pagpasipala (1 Ped. 2:23). Iya sa Dios ang pagpamatuod ug pagmatarong. Dili na nato pamatud-an pa ang atong kaugalingon.
Ang Sumbanan ni Watchman Nee
Wala ta makulangig mga sumbanan diha sa kasaysayan sa iglesia kon unsaon pagtagad ang kagubot. Gibatasan sa atong mga igsoong Nee ug Lee ang paghulat atubangan sa Ginoo aron pabuhaton Siya ug pagamiton sa panahon sa pagmatarong sa Iyang buhat.
Bisan sa dekada 1920–1929 pa, sa pagsugod ni Watchman Nee sa iyang pagpangalagad, nasinati na niya ang pagsupak. Gipalagpot siya sa iyang mga masigka-magbubuhat tungod sa desisyon niya nga mobiya sa mga denominasyon ug nisupak sa pagtudlo sa usa kanila nga mahimong pastor. Sa tibuok pagpangalagad niya, kanunay siyang nasaypan sa pagsabot, dili hustong gihulagway, gisaway, ug giataki. Gipakaylap ang daotang mga hunghungihong bahin niya. Apan, wala gyod niya gimatarong ang iyang kaugalingon o nakig-away ba siya ni bisan kinsa. Wala man ngani siyay gisulti aron ipatin-aw ang sayop nga mga pagsabot. Gidawat niya kining tanan ingog mga pagtagad sa Ginoo ug kanunay siyang nagpagiya sa Ginoo.
Sa dekada 1940–1949, nahitabo ang kagubot sa iglesia sa Shanghai diin nasaypan pagsabot si Watchman Nee ug gibutangbutangan sa daghan kaayong masigka-magbubuhat, mga anciano, ug mga balaan. Sa gihapon, ang tubag ug tinagdan niya pagpas-an lang sa krus, pag-ampo, ug ang Ginoo maoy gipasulbad niadtong sitwasyona. Tungod niana, naundang ang pagpangalagad ni Brother Nee sa unom ka tuig. Taliwala ning kagubota, giingnan niya si Brother Lee, “Witness, kat-onan gyod nato nga dili mosultig bisan unsa sa pagmatarong sa atong kaugalingon. Sultian lang nato ang mga tawo sa kamatuoran.” Gisultian man ngani niya si Brother Chang Yu Lan nga gibati niya nga dili na gyod tingali siya makabalik sa pagpangalagad. Dili man tungod niya mismo kondili tungod gyod sa kamot sa Ginoo nga sa kapulihay napahiuli ang iyang pagpangalagad sa 1948, ug daghang kaiglesiahan ang napabangon didto sa China sa nisunod nga mga tuig.
Ang Sumbanan ni Witness Lee
Nakasinati sab si Brother Witness Lee og daghan kaayong pagsupak, ug nisunod siya sa sumbanan ni Brother Nee sa pagtagad sa kagubot. Sa dekada 1950–1959, dihay grupo sa batan-ong mga masigka-magbubuhat nga naimpluwensyahan ni Brother T. Austin Sparks nga nakaingon og dakong kagubot sa kaiglesiahan sa Taiwan. Nilungtad kining kagubota og walo ka tuig ug nakaapekto man ngani sa kaiglesiahan sa ubang nasod, lakip na sa iglesia sa Manila. Walay gibuhat si Brother Lee sa pagmatarong sa iyang kaugalingon o pagtagad ba sa sitwasyon o sa mabingkilong mga magbubuhat sa natural nga paagi. Nikabat og dul-an sa usa ka dekada nga paghulat atubangan sa Ginoo ug sa dili masayop nga kamot Niya sa pagsulbad sa sitwasyon.
Panahon sa unos sa iglesia sa Manila sa 1961, nanuhol ang pipila ka magsusupak og armadong mga gwardiya aron dili makasulod sa tigomanan ang mga anciano ug mga balaan. Kon yanohon, gipalagpot gikan sa kaugalingon nilang tigomanan ang mahigugmaong mga nagtinguha sa Ginoo. Tungod sa mapugsanong buhat sa mga magsusupak, nitelegrama ang mga anciano sa iglesia sa mga igsoon sa Taiwan ug Hong Kong aron makig-ambitay. Ang tubag ni Brother Lee mao nga dili dayon maglain og tigom kondili maningkamot pa nga makigsultianay sa mga magsusupak. Klaro gyong naningkamot si Brother Lee kutob sa iyang mahimo nga magmainantoson ug magmapailobon sa mga magsusupak hangtod sa kataposan.
Sa ulahing bahin sa dekada 1980–1989, nagkunsabo ang pipila ka nangunang masigka-magbubuhat nga mosupil sa pahiuli sa Ginoo ug niabot kini sa upat ka kontinente, lakip na sa iglesia sa Anaheim diin nagtigoman si Brother Lee. Ang tubag ni Brother Lee mao nga naghilom ug nagmainampoon siya, gipabuhat man ngani ang mga magsusupak sa tanan nilang mahimo sa pagpukan sa buhat. Ang tinagdan niya ning tanang sitwasyona mao nga kanunay gyod siyang nagmainampoon ug naghulat atubangan sa Ginoo. Sa daghan kaayong higayon sa pag-atubang niyag kagubot diha sa iglesia, niingon siya nga “Kon akoa kining buhat, pukanon gyod kini; apan kon buhat kini sa Ginoo, dili mo makapukan niini. Labi ninyo kining pukanon, labi sab kining mabanhaw.”
Sa gipakig-ambit niya kalabot sa paagi sa pagtagad sa mga problema diha sa pahiuli, gihatagag gibug-aton sa atong igsoon ang panginahanglan nga tinuod gyong magtagad sa pahiuli sa Ginoo sa walay pagsambog niini sa kaugalingon natong mga tinguha:
“Aron maatiman ang mga problema diha sa pahiuli sa Ginoo, kinahanghan nga tinuod ug kinasingkasing gyod tang magtagad sa pahiuli sa Ginoo, nga walay mapihigong hunahuna kalabot sa bisan unsang butang. Labot pa, wala gyod unta tay bisan unsang elemento sa pagtinguha-sa-kaugalingon, paglaraw-sa-kaugalingon, pagtamod-sa-kaugalingon, ug paghunahuna-sa-kaugalingon. Wala gyod unta tay pagpihig, maangayon, ug putli, walay nagpaluyong butang nga makaapekto nato. Biyaan gyod nato ang atong pagtamod-sa-kaugalingon ug paghunahuna-sa-kaugalingon. Naay kaugalingong dungog tang tanan, ug ganahan tang motamod pag-ayo sa atong kaugalingon. Naglaom sab ta nga motamod pag-ayo nato ang uban. Basta magtinguha ta nga tahoron diha sa iglesiahanong kinabuhi, mahimo tang problema. Sige tingali tang naghunahuna nga, “Ako diay, ang akong posisyon, ang akong kaugmaon, ug ang akong tinguha?” Kon gihunahuna nato ang atong kaugalingon sa tanang panahon sa ingon niini, dili ta makaatiman sa mga problema sa pahiuli sa Ginoo. Aron makaatiman sa mga problema, magmaputli gyod ta, masulayan, ug magpasusi sa Ginoo. Kon duna tay putli, tinuod, ug kinasingkasing nga pagtagad sa pahiuli sa Ginoo, maangayan tang moatiman sa mga problema. Kay kon dili, mahimo tang problema.”
(Pagbansay sa Mga Anciano, Ikanapulong Basahon: Ang Pagkaanciano ug ang Paaging Gitudlo-sa-Dios, cap. 1)
Mga balaan, makig-away ta tungod ug alang sa pahiuli sa Ginoo, apan ayaw pagpakig-away tungod ug alang sa kaugalingon. Sa pag-atiman nato sa pahiuli sa Ginoo, kat-onan nato nga magdumili sa kaugalingon ug magpas-an sa krus (Mat. 16:24; Mar. 8:34). Kon buhaton nato kini, nan, buhaton sa Ginoo ang tanang ubang buhatonon. Iyaha ang pahiuli ug matinumanon Siyang moamping sa Iyang tinguha dinhi sa yuta. Sa atong bahin, isipon nato nga kalipay ug himaya kanang mag-antos ta tungod og alang sa Ginoo ug sa iglesia (1 Ped. 2:20; 3:17; 4:2; Sant. 1:2). Hinumdomi nga “kon gipakaulawan mo sa ngalan ni Cristo, bulahan mo, kay nagpabilin nganha ninyo ang Espiritu sa himaya ug sa Dios” (1 Ped. 4:14). Sa ingon niini, masinati nato si Cristo ug makaila sa gahom sa Iyang pagkabanhaw sa pag-ambit nato sa Iyang mga pag-antos tungod ug alang sa iglesia, nga Lawas Niya.
Mangalagad sa Himsong nga Mga Pagtulon-an—Kinabuhi ug Kamatuoran
Nan, unsaon man nato pagtabang ang mga masigka-magtutuo nato nga naapektohan sab sa unos? Maghilom ba lang ta ug walay isulti samtang nadaot o napandol sila? Niingon ang Tito 1:9 nga, “Nagkupot sa kasaligang pulong, nga sumala sa pagtulon-an sa mga apostol, aron makahimo siya sa pagpanambag pinaagi sa himsog nga pagtulon-an ug makapatuo niadtong mga nisupak.” Niingon pa gyod si Pablo sa 2:1, “Apan ikaw, isulti ang mga butang nga sibo sa himsog nga pagtulon-an.” Tin-aw natong makita sa Mga Sulat ni Pablo kang Timoteo ug Tito nga gisugo ta niya nga matinumanong isulti ug itudlo ang himsog nga pagtulon-an taliwala sa nadaot nga sitwasyon (1 Tim. 1:3; 4:6, 12; 2 Tim. 1:13; 2:2). Ang himsog nga mga pagtulon-an mao ang mga pulong nga uyon sa pagtulon-an sa mga apostol nga makatabang sa pagtuman sa pamatigayon sa Dios. Nagpasabot kini nga kinahanglan masangkapan ta sa pulong sa Dios ug ipamulong kini ug positibong ipangalagad si Cristo sa mga balaan! Mahimo na nganing subjectibong kamatuoran nato ang objectibong mga kamatuoran, makapangalagad ta sa kamatuoran ingon nga kinabuhi, kahayag, ug realidad ngadto sa mga balaan, ug molamoy sa tanang kamatayon ug negatibong mga butang ang kamatuorang nagpalatay sa diosnong mga realidad. Kon matinumanon tang mangalagad og Cristo, masangkapan ang mga balaan sa diosnong kinabuhi nga gikinahanglan aron makabarog batok sa sitwasyon sa kamatayon sa atong palibot. Taliwala sa kagubot, padayon lang nga namulong si Brother Lee og kinabuhi ngadto sa mga balaan ug kaiglesiahan. Wala siya magmapasagaron ug wala modiretsog tubag sa mga pangakusar kondili namulong lang og mga pulong sa kinabuhi. Makat-on sab gyod unta ta nga mamulong og mga pulong sa kinabuhi matag panahon nga mahinagbo nato ang mga balaan. Sa ingon niini, datong masangkapan ug matabangan ang mga balaan; bisan ang mga nisupak mapatuo ug maulawan man (Tito 2:8).
Ang himsog nga mga pulong bali sa binuang nga mga pangutana, mga panaglalisay, mga pagbingkilay, kawang nga mga sultisulti, ug pagsupak (1 Tim. 6:20; 2 Tim. 2:16, 23; Tito 3:9). Iya kining tanan sa kahoy sa kahibalo sa maayo ug daotan ug moresulta sa pagkapatay ug mopatay sa mga makadungog. Dili gyod nato ipamulong ang negatibong mga butang sa kahoy sa kahibalo. Ipamulong hinuon nato ang positibong mga butang sa kahoy sa kinabuhi, nga mao ang mga butang sa Tulo-usang Dios sa Iyang mga kaayo ug maayong kagawian, lakip na ang Iyang diosnong mga buhat ug walay kataposang kaluwasan. Kini ang himsog nga mga pulong, nga makaayo sa mga balaan (1 Tim. 4:8; 2 Tim. 3:16; Tito 3:8). Ipamulong gyod nato si Cristo, ang Espiritu, ang kinabuhi! Mga balaan, dili gyod unta ta kapoyan sa pagpamulong sa mga butang sa kinabuhi. Ang pahiuli sa Ginoo pagpahiuli man sa kinabuhi. Busa, aron maampingan sa ingon niini, magmatinumanon gyod tang mopadayon sa mga butang nga gitudlo ug gipiyal sa atong mga igsoon kanato (2 Tim. 3:14). Magpalayo ta sa kahoy sa kahibalo ug mokapyot sa kahoy sa kinabuhi sa kayano ug pagkabug-os sa kasingkasing.
Dunay Putling Kasingkasing
Human sa pahimangno ni Pablo nga matinumanong itudlo ang pamatigayon sa Dios, niingon siya sa 1 Timoteo 1:5, “Apan ang tuyo sa pahimangno paghigugma man nga gikan sa putling kasingkasing ug sa maayong konsensya ug sa pagtuong walay pagminaot.” Samtang moresulta sa kasina ug pagbingkilay diha sa mga balaan ang lahing mga pagtulon-an, nagkinahanglag gugma nga gikan sa putling kasingkasing, maayong konsensya, ug pagtuong walay pagminaot ang pag-amping sa himsog nga pagtulon-an. Sa pagtagad sa bisan unsang kagubot, mahigugma gyod ta sa mga balaan. Bisan sa pagtagad nato sa tawong nisupak nato, magpabilin gyod tang putli sa paghigugma kaniya. Dili ta gustong mohukom o mopakaulaw bag tawo. Dili ta gustong makapasilo. Gusto natong likayan ang mga pundokpundok o mga pagbahibahin bisan unsa pay bugti. Bisan ang pagbatasan sa pagkwarentinas ingon sa gipadayag sa Biblia dili man aron ipalagpot kondili aron ipahiuli ug ipabalik ang nahugawan (Lev. 13:45-46, Num. 5:2; 12:10, 14). Alang niini, magbaton gyod tag putling kasingkasing sa paghigugma sa mga balaan (Juan 13:34; 2 Tim. 2:22; Mat. 5:8; 1 Ped. 1:22). Ang tumong nato dili man kining negatibong mga butang. Ang bugtong tumong nato mao gyod ang pagpakaylap sa pahiuli sa Ginoo, pag-amping sa pagkausa, ug pagtukod sa Lawas ni Cristo. Alang niini, ang gugma gihapoy labing maayong paagi (1 Cor. 12:31; 13:1-13).
Magsulay sa Atong Pagtuo ug Magputli sa Pahiuli sa Ginoo
Sa kataposan, makaamgo gyod unta ta nga ning panahona, palad sa iglesia nga mag-antos sa kagubot. Sa kasaysayan sa pahiuli sa Ginoo, gibanabana ni Brother Lee nga matag napulo o kapin ka tuig, makasinati tag unos. Dili gyod ta matingala kon moabot ang pagsupak, kay ang pahiuli sa Ginoo lihok man sa Dios dinhi sa yuta karon. Butangbutangan ug pasanginlan gyod ta. Makasinatig daghang pag-antos ang kaiglesiahan, mga balaan, ug mga pamilya man ngani. Buhaton ni Satanas ang tanan niyang mahimo sa pag-ulang ning lihoka. Apan segun sa atong kasaysayan ug kasinatian, sukwahi sa atong mga hunahuna, sa pagkatinuod moputli sa pahiuli sa Ginoo ang kagubot:
““Palad sa nag-uswag nga iglesia, sa nagdumuluong nga iglesia, ang kagubot. Sa nagpanaw ang iglesia dinhi sa yuta isip hiniusang dumuluong, palad niini nga mag-antos og kagubot. Gikinahanglan nato kanang kagubot aron maputli ta. Segun sa tinan-awan nato, dili kaayo maayo ang kagubot, apan segun sa tinuod natong sitwasyon, gikinahanglan kini.”
(Pagbansay sa Mga Anciano, Ikanapulong Basahon: Ang Pagkaanciano ug ang Paaging Gitudlo-sa-Dios, cap. 1)
Matag unos kahigayonan man nga maputli ta sa Ginoo. Busa, susihon gyod nato ang atong kaugalingon kon unsay baroganan nato atubangan sa Ginoo: “Nahigugma ba ta sa mga igsoon? Putli ba tag kasingkasing tali sa Iyang pahiuli? Tin-aw ba ang atong konsensya? O duna bay problema sa atong pagkatawo?” Mangutana gyod ta sa Ginoo ning tanang butanga ug magpaputli Niya. Dili gyod ta maghunahuna nga husto ta ug dili husto ang uban. Batokan gyod nato ang kaugalingon ug ihalad pag-usab sa Ginoo ang atong kaugalingon aron mobarong alang sa Iyang pahiuli nga dunay putling kasingkasing. Tungod nianang mga pagbatoka, makita nato unsa kadako nga maumol sa Ginoo ang Iyang Kaugalingon sa atong pagkatawo taliwala sa kagubot.
Sa mga panahon sa pag-antos ug kagubot, makakat-on tang tanan og importanteng pagtulon-an gikan ni propetang Zacarias. Anak ni Berequias ug apo ni Ido si Zacarias nga sacerdote-propeta (Zac. 1:1). Sa Hebreohanon nagpasabot ang ngalang Ido og “sa gitakdang panahon”; nagpasabot ang ngalang Berequias og “magpanalangin si Jehova”; ug nagpasabot ang ngalang Zacarias og “mahinumdom si Jehova.” Busa, ang kahulogan sa tulo ka ngalan mao nga sa gitakdang panahon magpanalangin si Jehova ug mahinumdom si Jehova. Sa pag-atubang nato sa unos, kagubot o pagkaawaaw diha sa iglesia, maghulat ta sa Ginoo alang ni “Ido”, sa gitakdang panahon sa Dios. Kasaligan ang saad sa Dios: “Apan magbag-o’emng kusog ang mga naghulat ni Jehova; manglupad sila nga dunay mga pako sama sa mga agila; managan sila ug dili kapoyan; manglakaw sila ug dili mangaluya” (Isa. 40:31).
Dili gyod ta magkaluya kon makahinagbo tag kagubot. Hinumdomi nga pahiuli kini sa Ginoo. Dili unta ta mapandol. Maluya na ngani ang atong pagtuo, motutok gyod ta Niya nga matinumanon. Motuo gyod ta nga ampingan ta sa Ginoo ug lig-onon man ngani ang Iyang pahiuli aron makalabang nianang mga unosa. Siya ang makahimo sa pagbantay ug pag-amping kanato (1 Tes. 5:23; sa Tes. 3:3; Judas 24). Siya sab ang motukod sa Iyang iglesia segun sa gisaad Niya sa Mateo 16:18. Dili nato ipunting ang atong pagtagad sa kagubot nga naa sa atong atubangan kondili ni Cristo nga hilwas nga modala nato sa pikas daplin. Gipahinumdoman ta sa Salmo 107:29 nga, “Gipalurang Niya ang bagyo, ug nilinaw ang mga balod sa dagat.” Malig-onan ug madasig unta tang tanan nga mopadayon sa dalan sa kinabuhi ug kamatuoran diha sa pahiuli sa Ginoo karon.